Украинд лазерын шинэ зэвсэг анх удаа хэрэглэсэн тухай ОХУ-ын албаны эх сурвалж өчигдөр ярьжээ.
2018 онд ОХУ-ын ерөнхийлөгч Владимир Путин тив алгасах баллистик пуужин, усанд шумбагч цөмийн дрон, дуунаас хурдан пуужин, лазерын зэвсэг зэргийг бүтээж байгаагаа анх зарласан юм.
Эдгээрээс лазерын шинэ зэвсгийн талаар мэдээлэл хамгийн бүрхэг байгаа. Тухайн үед Путин шинэ зэвсгийн нэрийг “Пересвет” гэж хэлж байжээ.
Энэ нь дундад зуунды үед тулааны талбарт амь үрэгдсэн үнэн алдартны шашны дайчин лам Александр Пересветийн нэр юм байна.
Шинэ зэвсгийн хөгжүүлэлт хариуцдаг ОХУ-ын засгийн газрын шадар сайд Юрий Борисов өчигдөр Москвад болсон арга хэмжээний үеэр газраас дээш 1,500 км хүртэл өндөрт байгаа хиймэл дагуулыг ажиллагаагүй болгох чадалтай Пересветийг туршиж эхэлснийг ярьжээ.
Бас Пересветээс ч илүү хүчтэй өөр лазерын зэвсэг зохион бүтээсэн тухай ярьсан байна. Тухайлбал 5 км-ийн зайнаас дроныг тавхан секундын дотор шатаах чадалтай лазерын шинэ зэвсгийн тухай ярьжээ.
“Пересвет хиймэл дагуулыг ажиллагаагүй болгодог бол бас нэг шинэ лазерын зэвсэг нь байг шууд шатааж устгах чадвартай юм” гэж тэр Оросын төв телевизээр ярьсан байна.
Уг зэвсгийг Украинд ашигласан эсэхийг сэтгүүлч асуухад Борисов “Тэгсэн. Туршилтын загварыг ашиглаж үзсэн” гэж хариулжээ. Шинэ лазерын зэвсгийг “Задира” гэж нэрлэдгийг тэр бас хэлсэн байна.
Харин Украины ерөнхийлөгч Володимир Зеленский энэ мэдээг сонсоод оросуудыг шоолсон агуулгатай мэдэгдэл хийжээ.
“Тэд дайнд ялах боломжгүй болсон тул нөхцөл байдлыг эрс өөрчлөх ямар нэг гайхамшигт зэвсгийн талаар сурталчилж эхэллээ. Дайн эхлээд гурав дахь сараа дуусгаж байхад Оросын тал “гайхамшигт зэвсэг” хайсаар байгаа нь тэдний зорилго бүтээгүйг тодорхой харуулж байна” гэж тэр хэлсэн байна.
Өмнө нь Задирагийн талаар ямар ч мэдээлэл олон нийтэд задарч байгаагүй юм. Лазерын шинэ зэвсэг хөгжүүлэх санаа АНУ, Хятад улсуудад бас яригдаж байгаа. Гэхдээ аль нь ч одоогоор бодитой үр дүнд хүрээгүй байна.
Цөмийн цэнэгт хошуутай баллистик пуужингийн нислэгийг чиглүүлдэг хиймэл дагуулыг лазерын зэвсгээр ажиллагаагүй болгож чадвал үнэхээр стратегийн чухал ач холбогдолтой дэвшил болно гэж судлаачид үздэг юм.
Эх сурвалж: Reuters