Хятадын хамгийн том хотын нэг Шанхайн сая сая оршин суугчид бараг хоёр сарын турш хатуу хөл хорионд байна. Ойрын өдрүүдэд хорио цээрийн дэглэм улам чангарах болно. Тухайн районы оршин суугчдыг гэр орноосоо гарах, хүнсний бүтээгдэхүүн хүргэхийг хориглох бөгөөд зөвхөн орон нутгийн Коммунист намын байгууллагын зөвшөөрлөөр иргэд эмнэлэгт хандах боломжтой болно.
Хэрэв хэн нэг хүн Ковид-19-өөр халдварласан болох нь тогтоогдвол бусад хөршүүд нь коронавирусын шинжилгээ сөрөг гарсан байсан ч улсын тусгай байранд өөрийгөө тусгаарлах шаардлагатай болно (ийм дүрэм хотын зарим хэсэгт үйлчилдэг). Ийм төвөөр үйлчлүүлсэн хүмүүс ариун цэврийн шаардлага хангаагүй, шүршүүр хүрэлцээгүй байгаа талаар гомдоллодог.
Лхагва гарагт Шанхай хотын эрх баригчид Ковид-19-ийн тохиолдлын тоо хотын дүүргийн дор хаяж тал хувьд нь тэг болж буурсан гэж мэдэгдсэн боловч хязгаарлалтыг цуцлах тухай яриа хараахан гараагүй байна.
Шанхайн Эрүүл мэндийн комиссын дэд захирал Жао Дандан "Одоогоор байдал тогтворгүй, Ковид-19 дахин дэгдэх эрсдэл байсаар байгааг байнга санаж байх ёстой" гэжээ.
Эрх баригч Коммунист намын орон нутгийн хороодын мэдэгдлийн дагуу ойрын гурван хоногт зөвхөн улсын шуудан зөөгчид л хотод хоол хүнс хүргэхийг зөвшөөрнө. Гэвч өмнө нь иргэд хоолоо захиалж чадахгүй, хүргэлт удаан хүлээдэг талаар удаа дараа гомдол гаргаж байсан.
Нэмж дурдахад, одоо зөвхөн Коммунист намын орон нутгийн хорооны зөвшөөрлөөр (яаралтай тохиолдлоос бусад үед) эмнэлэгт очих боломжтой болно.
Сүүлийн өдрүүдэд өмнө нь хатуу хязгаарлалт тавиагүй зарим хэсгийн оршин суугчид орон сууцны хорооллуудын эргэн тойронд өндөр хашаатай болсон тухай мэдээлжээ.
Шанхайд илүү хатуу арга хэмжээ авсан нь БНХАУ-ын дарга Ши Жиньпин “COVID-ийг тэглэх” стратегийн амлалтаа зарласнаас хэдхэн хоногийн дараа тохиов.
ДЭМБ-ын тэргүүн Тедрос Гебрейюс Ковид-ын өвчлөлийг тэглэх бодлого үр дүнтэй гэдэгт эргэлзэж байгаагаа илэрхийлэв. Тедрос мягмар гарагт болсон хэвлэлийн бага хурлын үеэр "Вирусын тархалтын динамикийг харгалзан энэ нь үндэслэлгүй гэж бид бодож байна."
Албан ёсны мэдээгээр, Хятад улсын хүн амын 90 орчим хувь нь вакцинд бүрэн хамрагдсан байна. Гэсэн хэдий ч Хятадын хамгийн эмзэг бүлгийн 60-аас дээш насны хүмүүсийн дөнгөж 38% нь гурван тун вакцин хийлгэжээ.
Эх сурвалж: ВВС