МОСКВА. /TASS/. Украинд явуулж буй ОХУ-ын цэргийн ажиллагаа төлөвлөгөөний дагуу явагдаж байгаа бөгөөд тавьсан зорилгоо бүрэн биелүүлэх хүртэл үргэлжилнэ гэж тус улсын Ерөнхийлөгч Владимир Путин Беларусийн төрийн тэргүүн Александр Лукашенкогийн хамт “Восточный” сансрын буудалд очих үеэрээ мэдэгджээ.

Үүний зэрэгцээ түүний хэлснээр, Украины тал гуравдугаар сарын сүүлчээр Истанбулд болсон уулзалтаар хүрсэн тохиролцооноосоо буцсан тул Киевтэй хийж буй хэлэлцээ дахин мухардалд орсон байна.

Оросын ажиллагаа төлөвлөгөөний дагуу үргэлжилж байгаа бөгөөд тавьсан зорилгодоо хүрмэгц дуусна гэж В.Путин мэдэгдэв. ОХУ-ын гол зорилго бол Донбассын ард түмэнд тусламж үзүүлэх бол “Украины зарим бүс нутагт явуулж буй ажиллагаа” нь зөвхөн Украины хүчнийг хөдөлгөж чадахгүй болгох, түүний цэргийн дэд бүтцүүдийг устгах, Донбасст байлдааны ажиллагааг эрчимжүүлэх нөхцөлийг бүрдүүлэх шаардлагатай холбоотой байсан гэж тэрбээр сануулжээ.

Гуравдугаар сарын сүүлчээр Истанбулд хүрсэн тохиролцооноосоо Киев буцсан нь Украинтай хийж буй хэлэлцээг хүндрүүлж байна гэж В.Путин мэдэгдэв. Украины байр суурь өөрчлөгдсөн тухай мэдээллийг даваа гарагт авсан тул тэрбээр одоохондоо бүх нарийн ширийн зүйлийг мэдэхгүй гэдгээ тодотгожээ.

Оросын удирдагч мөн “хэлэлцээний хэд хэдэн үе шатыг нутаг дэвсгэртээ сайн зохион байгуулсанд” Беларусьт талархаж буйгаа илэрхийлээд “цаашид холбоо харилцаа тогтооход Беларусийн талбар бүрэн тохиромжтой” гэж онцолсон байна.

Мягмар гарагт Орос, Беларусийн удирдагчид “Восточный” сансрын буудалд зочилж, пуужин-сансрын салбарын төлөөлөгчидтэй уулзсаныхаа гурван цагийн турш хэлэлцээ хийсэн юм. Хоёр улсын удирдагчид хэлэлцээнийхээ дараа хамтарсан хэвлэлийн бага хурал хийсэн байна. Лхагва гарагт В.Путин ажилдаа эргэн орж, Арктикийн хөгжлийн талаар уулзалт хийх бол А.Лукашенко Владивостокт айлчилж байна.

Д.Жаргал

Эх сурвалж: "Монцамэ" агентлаг