Мягмар гарагт Европын Холбооны гишүүн Итали, Испани, Дани улсууд Оросын дипломатчидад 48 цагийн дотор нутаг дэвсгэрээсээ гарч явах шаардлага хүргүүлжээ.
Украины Буча хотод Оросын цэргүүд энгийн номхон иргэдийг олноор хядсан баримтууд илэрсний дараа Европын Холбооны орнууд нийтдээ 150 дипломатчийг хөөх арга хэмжээ аваад байна.
Кремлийн хэвлэлийн төлөөлөгч Дмитрий Песков өчигдөр сэтгүүлчидтэй уулзахдаа дипломатчидыг нь хөөсөн явдлыг “алсын хараагүй алхам” гэж шүүмжилжээ.
“Урьд өмнө тохиолдож байгаагүй хүнд хэцүү хямралын үед шийдэл олоход зайлшгүй шаардлагатай дипломат харилцаа холбоо тогтоох боломжийг хумих нь алсын хараагүй алхам юм. Энэ тохиолдолд бид зайлшгүй хариу арга хэмжээ авна” гэж тэр хэлсэн байна.
Өчигдөр Европын Холбооны гишүүн орнууд Украинд эзлэн түрэмгийлэх дайн эхлүүлсэн ОХУ-ын эсрэг авах тав дахь ээлжийн хориг арга хэмжээн дээр тохиролцож чадсан юм. Ээлжит хориг арга хэмжээ авах шийдвэрийг ойрын өдрүүдэд батлах гэж байна.
Италийн гадаад хэргийн сайд Луйжи Ди Майо “үндэсний аюулгүй байдлын шалтгаанаар” Оросын 30 дипломатчийг хөөж байгааг мэдэгджээ.
Үүнээс хойш хэдхэн цагийн дараа Испани улсын гадаад хэргийн сайд Оросын 25 дипломат ажилтныг нутаг дэвсгэрээсээ гаргах болсныг зарласан байна.
“Оросын цэргүүд гарч явсны дараа Буча хотын иргэдийг хядсан баримтууд ил болсон нь биднийг маш их бухимдууллаа” тус улсын гадаад хэргийн сайд Хосе Мануэл Албарез мэдэгджээ.
Дараа нь Швед улс Оросын гурван дипломатчийг, Дани улс 15 дипломатчийг “хууль бус ажиллагаа, тагнуулын ажиллагаа” явуулсан шалтгаанаар хөөсөн байна.
Даваа гарагт Оросын 35 дипломат ажилтныг Франц улс, 40 дипломатчийг Герман улс тус тус нутаг дэвсгэрээсээ хөөсөн юм.
Бучагийн аллагатай холбоотойгоор Литва улс тус улсад суугаа ОХУ-ын элчин сайдыг нутаг дэвсгэрээсээ хөөж байгааг бас Даваа гарагт зарлажээ.
Оросын эзлэн түрэмгийлэл эхэлсэн цагаас хойш Европын Холбооны улсууд нийт 260 дипломат ажилтныг хөөгөөд байна.
Эх сурвалж: AFP