Орос-Украины хямралд Израил улс идэвхтэй зуучлагчийн үүрэг гүйцэтгэж эхэлжээ.
Өнгөрсөн амралтын өдрүүдэд Израилын ерөнхий сайд Нафтали Беннет энэ асуудлаар Москва, Берлин хотуудад дараалан айлчилсан байна.
Ням гарагт засгийн газрынхаа хуралдааныг нээхдээ Беннет “Би хэдхэн цагийн өмнө Москва, Берлинд хийсэн айлчлалаасаа буцаж ирлээ” гэж ярьжээ.
Бямба гарагт тэрбээр Украины ерөнхийлөгч Володимир Зеленскийн хүсэлтээр Москвад айлчилж, ОХУ-ын ерөнхийлөгч Владимир Путинтэй гурван цаг ярилцсан байна.
Дараа нь тэр Москвагаас Германы нийслэл Берлинд зочилж, канцлер Олаф Шольцтой уулзсан гэнэ. Бямба гарагийн орой Беннет хоёр удаа Зеленскийтэй утсаар ярьж, Ням гарагийн өглөө дахин нэг удаа ярьсныг Тель-Авивын албаны эх сурвалж мэдээлжээ.
Ням гарагт тэр бас Францын ерөнхийлөгч Эммануэл Макронтой утсаар ярьсан байна.
Израилын ерөнхий сайд Орос ба Украины хооронд зуучлах ажилд нэлээд хүчин чармайлт тавьж байгаа нь энэ бүхнээс харагдаж байгаа юм.
Израил бол АНУ-ын томоохон холбоотноос гадна ОХУ-тай батлан хамгаалах салбарт өргөн харилцаатай байдаг улс. Тухайлбал Израил, Оросын талууд Сирийн нутаг дэвсгэрт явуулж буй тус тусын цэргийн ажиллагааныхаа талаар байнга мэдээлэл солилцож, хамтран ажилладаг.
Өрнөдийн орнууд өнөөдөр ОХУ-д эдийн засгийн хатуу хориг арга хэмжээ зарлаад байгаа бол Израил улс одоогоор үүнд нэгдээгүй байгаа.
Гэхдээ сүүлийн үед Израилын дотоод улс төрийн хүрээнд уг хоригт нэгдэх шахалт улам бүр нэмэгдэж байгаа тухай орон нутгийн хэвлэлүүд мэдээлж байна.
Эх сурвалж: Reuters