Санхүү, эдийн засгийн тэргүүлэх мэдээллийн хэрэгсэл “Файнансиал Таймс” сэтгүүл “Рио Тинто" компани Оюутолгойн 2.3 тэрбум ам.долларын өрийг тэглэх санал гаргасныг 2021 оны 12 дугаар сарын 13-ны өдөр онцлон мэдээллээ.

Тус мэдээлэлд “Рио Тинто” компани Монголын говьд явагдаж байгаа том хэмжээний зэсийн төслийн бүтээн байгуулалтыг дуусгах эрмэлзэлтэй байгаагийн хувьд Монгол Улсын Засгийн газрын төлөх 2.3 тэрбум ам.долларын өрийг тэглэх санал тавьсан талаар дурдаад энэ нь талуудын хооронд бий болоод удаж байгаа согогтой харилцааг засах, Оюутолгойн ордын далд уурхайн бүтээн байгуулалтыг буцааж замд нь оруулах зорилготой өргөн агуулга бүхий таван зүйл саналын нэг хэсэг нь гэж бичсэн байна. Мөн тус мэдээнд төслийн үйл ажиллагаа хоёр жилээр хоцорч, өртөг нь 5.3 тэрбум ам.доллароос 6.45 ам.доллар болж нэмэгдсэн ба төслийн зардал ийнхүү нэмэгдсэн нь ихээхэн маргаантай байгаа төдийгүй Их Британи болон АНУ-ын зохицуулагч байгууллагууд шалгаж байгааг дурджээ.

Түүнчлэн, тус мэдээнд Риогийн энэхүү санал нь Монгол Улсын Парламентаар батлагдах ёстойг онцолж, 2015 онд гарын үсэг зурсан 4.4 тэрбум ам.долларын далд уурхайн бүтээн байгуулалтын төслийг Монгол Улсын Парламент батлаагүйн зэрэгцээ, энэ нь тус уурхайгаас ирж байгаа санхүүгийн үр ашгийн дийлэнх хэсгийг Монгол Улс хүртэх ёстой гэж үздэг хүмүүсийн шүүмжлэлийн гол цэг болдог талаар дурдсан байна.

Риогийн санал нь цахилгаан машины үйлдвэрлэлээ нэмэгдүүлж байгаа европын машин үйлдвэрлэгчдэд литий нийпүүлэх зорилготой төслийг Сербид хэрэгжүүлэх зөвшөөрөл авахаар оролдож байгаатай нь давхцаж байгааг болон мөн тус компани 46,000 жилийн настай аборигенчуудын орон байрыг нураасантай холбоотой унасан нэр хүндээ сэргээхээр оролдож байгааг мэдээнд дурджээ.

Эх сурвалж: Rio Tinto offers to write off $2.3bn Oyu Tolgoi loan Financial Times (ft.com)