СӨҮЛ. /Yonhap/. БНСУ-д энэ оны 8-10 дугаар сард явуулсан мансууруулах бодистой тэмцэх тусгай ажиллагааны үеэр 1956 хүнийг саатуулж, 406-г нь албан ёсоор баривчилсан талаар тус улсын Үндэсний цагдаагийн газраас өнөөдөр мэдээлжээ.
Тэдний 1404 нь метамфетамин, экстази зэрэг сэтгэцэд нөлөөт бодис хэрэглэж байхдаа, 417 нь марихуаны төрлийн бодис, 135 нь опиум, кокаин, фентанил зэрэг бусад төрлийн мансууруулах бодис хэрэглэж байхдаа саатуулагдсан байна.
Насны хувьд авч үзвэл, нийт сэжигтний 70 хувийг /1365/ өсвөр насны хүүхдүүд, 20, 30-аад насныхан эзэлжээ. Тодруулбал, 20-иод насныхан хамгийн их буюу 37.9 хувийг, 30-аад насныхан 29.2 хувийг, 40-өөд насныхан 16.5 хувийг, өсвөр насныхан 2.6 хувийг эзэлсэн байна.
Гэмт хэргийн төрлөөр нь авч үзвэл, 70 гаруй хувь нь мансууруулах бодис хэрэглэсэн, 24.6 хувь нь мансууруулах бодис нийлүүлсэн, 2.7 хувь нь сэтгэцэд нөлөөт бодис тариaлахыг оролдсон, 0.8 хувь нь мансууруулах бодис үйлдвэрлэх, хилээр нэвтрүүлэхийг завдсан байна.
Мөн мансууруулах бодисны цахим худалдаанд оролцсон сэжигтнүүдийн тоо өсжээ. Цагдаагийн ажилтнууд тусгай ажиллагаа явуулсан гурван сарын хугацаанд 46.7 кг метамфетамин хураан авсан нь өнгөрсөн оныхоос /24.5 кг/ ойролцоогоор хоёр дахин нэмэгджээ.
Цаашид өсвөр насныханд мансууруулах бодисын хор хөнөөлийн талаар таниулах, мансууруулах бодисын цахим худалдаатай тэмцэх ажиллагааг эрчимжүүлнэ гэж Үндэсний цагдаагийн газap мэдээлсэн байна.
Э.Хулан
Эх сурвалж: Монцамэ агентлаг
