БСШУС-ЫН САЙД ЦАХИМ ГЭМТ ХЭРЭГТЭЙ ТЭМЦЭХЭД ФЭЙСБҮҮК КОРПОРАЦТАЙ ХАМТАРЧ АЖИЛЛАХ ХҮСЭЛТЭЙ БАЙГААГАА ИЛЭРХИЙЛЭВ


Монгол Улсын Боловсрол, соёл, шинжлэх ухаан, спортын сайд Ё.Баатарбилэг Америкийн Нэгдсэн Улсын Калифорни мужийн Менло Парк хот дахь Фэйсбүүк корпорацын тѳв оффист ажиллалаа. Фэйсбүүк корпорацын олон улсын бодлогын айлчлал хариуцсан захирал, хатагтай Стина Трейно, бусад албаны тѳлѳѳлѳгчид болон Фейсбүүк корпорацид ажиллаж буй монгол залуустай уулзалт хийв.

Уулзалтаар Ё.Баатарбилэг сайд Фэйсбүүк корпорацын Хамрагдах интернетийн индексийн 2018 оны судалгаагаар Монгол Улс Ази тивд нэгдүгээрт, дэлхийд 10 дугаар бичигдэж байна. Үүнийг дагаад ерөнхий боловсролын сурагчдын дунд цахимаар гадуурхах асуудал гарч байгаатай холбогдуулан хэрхэн хамтран ажиллах талаар санал солилцож, ажил хэрэг болгох хүсэлтэй байгаагаа уламжиллаа.

Монгол Улсын Цагдаагийн ерөнхий газар, Ази-Номхон далайн бүс хариуцсан Фэйсбүүк корпорацын төлөөлөгчдийн хамтарсан уулзалт 2018 онд зохион байгуулагдсан бөгөөд тус уулзалтаар цахим гэмт хэрэгтэй тэмцэх чиглэлээр хамтран ажиллах асуудлыг хөндөж, энэ төрлийн гэмт хэргийн гаралтыг таслан зогсооход чиглэсэн ажлуудыг хамтран хэрэгжүүлэхээр зарчмын хувьд тохиролцсоныг дахин дурдаж, Монгол Улсын Цагдаагийн байгууллагын цахим гэмт хэрэгтэй тэмцэх алба хаагчдыг мэргэшүүлэх сургалтад хамруулах, туршлага судлуулах, дээрх чиглэлээр хамтарсан төсөл, хөтөлбөр хэрэгжүүлэх боломжийн талаар холбогдох газруудад уламжилж, ажил хэрэг болгохыг хүсэв.

Фэйсбүүк корпорац тавьсан санал, хүсэлтийг судлан үзэж, холбогдох удирдлагуудад хандан ойрын хугацаанд арга хэмжээ авахаа мэдэгдэж, өөрсдийн шинэ дэвшилтэт VR технологийг боловсрол, эрүүл мэндийн салбарт хэрхэн ашиглаж байгаа талаар танилцуулга хийв.

Фейсбүүк корпорацд ажиллаж байгаа монгол ажилтнуудын хувьд өөрсдийн ажлын байрны тухай, цахим мэдээллийг зөв зохистой хэрэглэх талаар санал солилцож, цахим боловсрол олгох контент боловсруулах шаардлагатайг онцолж байлаа.

 


Энэ мэдээ таалагдаж байвал:


  • монгол · [66.181.161.10] · 2019/12/18

    сошиалаар бүлэглэн илт зохион байгуулалтай байгууллагын үйл ажиллагаанд сөрөг нөлөөлөл бий болгож өөрсдийнхөө үйлдэлд бусдыг татан орхолцуулах зорилго бүхий үйлдэлүүд газар авч үйлдэгсэд үндсэн ажилаа оромддогоо мартаад даварч авир ааш аль болохгүйгээ гаргаж байхад хууль хяналт хаана явна вэ ?


  • зочин · [66.181.161.23] · 2019/12/15

    цахимаар хүн гүжирдэх зохион байгуулалтайгаар өөрсдийг нь хүлээн зөвшөөрөөгүй хүмүүсээс өш хонзон авах өөрийнхөө буруу үйлдэлээ цэвэрлэх гэх мэт үйл ажиллагааг аль нэг олон нийтийн байгууллагын нэрийг барин хууль илтээр зөрчигсөд замаа алдлаа иймээс эрүүгийн болон зөрчлийн хуулинд тусгаж чангатгахгүй бол энэ улс орныг самарч дуусгах хүмүүс замбараагаа алдлаа монголд төр байна уу, эрхэм амлагчид хууль санаачилагсад хаана юу сонсож юу хийж явна вэ ,