МАН-ын Удирдах зөвлөл өнөөдөр хуралдаж, Сонгуулийн тухай хуулийн төслийг хэлэлцжээ. Ингэхдээ ирэх оны сонгуулийг холимог мажоритар тогтолцоогоор 50:26 гэсэн хувилбараар явуулах саналыг МАН-ын Удирдах зөвлөлийн гишүүдийн олонх дэмжсэн талаар эх сурвалж хэллээ. Ингэснээр 50 нь жижиг тойрогт, 26 нь намын жагсаалтаар улс даяар нэр дэвших хуулийн төслийг УИХ-д өргөн барих бололтой. Энэ хувилбараар сонгогчид өөрийн тойргийн нэр дэвшигчийг сонгохоос гадна томсгосон тойргийн нэр дэвшигчдээс давхар сонголт хийх юм. Холимог мажоритар нь 2012 оны сонгуулийг явуулсан мажоритар пропорцианалийн холимогоос нам биш хүний нэр сонгохоороо ялгаатай. Харин уг хувилбараар сонгууль явууллаа гэхэд томсгосон тойргоос хамгийн олон санал авсан 26 хүнийг шууд сонгох уу, эсвэл намаас нэр дэвшсэн 26 хүний нийт авсан саналын хувиар жагсаалтын дагуу парламентад оруулах уу гэдэг нь эргэлзээтэй байгаа. Тэгвэл МАН-ын УЗ-өөс томсгосон тойрогт нэр дэвшигчдээс хамгийн олон санал авсан 26 хүнийг парламентад оруулах хувилбарыг дэмжсэн аж.
МАН-ын Удирдах зөвлөл сонгуулийн 50:26 хувилбарыг дэмжжээ
Энэ мэдээ хуучирсан буюу 2019/11/29-нд нийтлэгдсэн мэдээ болно.