Үндсэн хуульд зааснаар шүүх эрх мэдлийг гагцхүү шүүх хэрэгжүүлнэ, шүүгч хараат бус байж, гагцхүү хуульд захирагдана. Нэг үгээр шүүгчийн хараат бус байх зарчмын цөм буюу амин сүнс нь гагцхүү хуульд захирагдах явдал юм.
Гэвч нийгэмд шүүх, шүүгчтэй холбоотой тааг мэдээлэл хөвөрсөөр байна. Парламент өчигдөр үдээс өмнө Улсын дээд шүүхийн шүүгчид нэр дэвшигчийг танилцуулахтай холбогдуулан шүүхийн өнөөдрийн байдалд нэлээд шүүмжлэлтэй хандлаа. Нэр дэвшигчид хандан Монгол Улсын шүүхийн хараат бус үйл ажиллагааг хангах, улс төрөөс ангид байх, шударга ёс, хуульд захирагдаж ажиллахыг захихын зэрэгцээ, шүүгчдийн сахилга бат, хариуцлагыг чангатгах, ёс зүйн хэм хэмжээндээ ажиллах шаардлагатай байгааг анхаарууллаа. Энэ үер ХЗДХ-ийн сайд Ц.Нямдорж: Дээд шүүхийг сүйрүүлж байгаа хүн бол Ц.Зоригт. Ц.Зоригтын үед Монгол Улсын шүүх хоёр нүүртэй болсон. Зоригт Монголын шүүхийг шударга бус ажиллуулж байна. Жирийн иргэн, жирийн бус гэж ялгавартай хандаж байна. Шүүхийг, прокурорыг улс төрийн байгууллага болгож хувиргасан хүн бол Ц.Элбэгдорж гэдэг увайгүй этгээд. Захиалга биелүүлсэн хүн нь албан тушаал авдаг,Сүхбаатарын одон, гавьяат болдог. Гэм зэмгүй хүмүүсийг шоронд хатаадаг болсон. Шүүхэд дур зоргоороо авирладаг явдал ердийн үзэгдэл болсон. Шударга ёс хуульд биш дарга нарт үйлчилдэг зодуурын хэрэгсэл болж хувирсан. Хараат бус байдлыг дур зоргоороо авирлах явдал гэж ойлгодог болсон. Шударга ёсыг УИХ-аас эхлэх ёстой гэдэг дээр санал нэг байна. Үүний цаана шударга ёсыг Дээд шүүхээс эхлэх ёстой. С.Соёл-Эрдэнийг ийм зүйлд орооцолдож байсныг би үгүйсгэхгүй. Дахиад битгий ийм зүйл хийгээрэй гэв.