Нийслэлийн Иргэдийн төлөөлөгчдийн хурлын ээлжит II хуралдаан цахимаар явагдаж байна. Хуралдаанд НИТХ-ын 45 төлөөлөгчөөс 19 нь онлайнаар оролцож, танхимд 10 гаруй гишүүн ирж оролцов.
Нийслэлийн Засаг дарга Д.Сумъяабазар Нийслэлийн хэмжээнд Ковид-19 халдварын эсрэг зарим арга хэмжээний талаар мэдээлэл өглөө.
Тэрээр “Коронавирусийн халдвар авсан ойрын болон дан хавьтагч нийт 7200 гаруй хүнд шинжилгээ хийсэн. Өнөөдрийн байдлаар тусгаарлах байранд 1536 иргэн байна. Хязгаарлалтын хүрээнд хотоос гарах, орох хөдөлгөөнийг хязгаарласан. Энэ хугацаанд 1900 гаруй тээврийн хэрэгсэл, 40 мянга гаруй иргэнийг нэвтрүүлсэн. Нийтийн тээврийн 94 чиглэлд 1 сая 182 мянган зорчигчийг тээвэрлэсэн. Халдвар илэрсэн газруудад 1 сая 700 гаруй мкв талбайд ариутгал хийлээ. Өдөрт 400-500 мянган тээврийн хэрэгсэл зорчдог байсан бол хязгаарлалт тогтоосноор 41 мянган тээврийн хэрэгсэл хөдөлгөөнд оролцож, 70 гаруй хувиар бууруулсан. Долоон дүүрэгт 497 мянган тонн нөөцийн мах борлуулсан. Нийслэлийн 8000 гаруй иргэдэд сайжруулсан түлш тараасан” гэлээ.
Ингээд Нийслэлийн Засаг дарга Д.Сумьяабазар НИТХ-ын зарим төлөөлөгчдийн асуултад хариулсан юм.
-НИТХ-ын төлөөлөгч П.Наранбаяр: Нийслэлийн Засаг дарга энэ хугацаанд ямар алдаа гаргав. Алдаагаа хэрхэн засахаар ажилласан бэ?
-Аж ахуйн нэгжүүдийн үйл ажиллагаа доголдож байгаа. Судалгаанд оролцсон 3500 гаруй аж ахуйн нэгжийн 5600 орчим ажлын байр хүндрэх, 258 тэрбум төгрөгийн алдагдал хүлээж асуудал гарч байна. Дүүргүүд эрсдэлийн үнэлгээгээ гаргаж, хэрхэн ажиллах талаар ойрын хоногт УОК-т танилцуулна. Зарим арга хэмжээнд алдаа гаргаж байгааг үгүйсгэхгүй ээ. Нэг авууштай зүйл нь хотод шинээр халдварын голомт бүртгэгдээгүй. Ойрын хавьтагч нарыг тогтоон тусгаарласан. Махны нийлүүлэлт хэвийн үнийн хөөрөгдөл болоогүй. Хөдөө, орон нутгаас тогтмол хугацаанд нийлүүлэлт хийгдэж байгаа. Онлайн түгээлт буюу худалдан авалт дээр онцгой анхаарч ажиллаж байгаа. Арванхоёрдугаар сарын 1-ээс хойш эдийн засгийн зөөлрүүлэх бодлого барих болно. Миний хувьд алдаа гаргасан бол иргэдээсээ уучлал хүсье. Хатуу хөл хорионы дэглэм бариагүй бол дотооддоо халдвар алдах эрсдэлтэй байсан. Мэдээж авсан арга хэмжээ иргэдийг бухимдуулсан, аж ахуйн нэгжид хүндрэл учруулсан зүйл байсан. Бүх нийтийн бэлэн байдлын зэрэгт шилжсэнээр гурван захирамжийг нийслэлээс гаргасан.
-НИТХ-ын төлөөлөгч, НИТХ дахь АН-ын бүлгийн дарга Д.Пүрэвдаваа: Ер нь Ковид-19 дотоодод халдвар гарах эрсдэлийг хэрхэн тооцож байсан юм бэ. Өнөөдрийн байдлыг харвал бэлэн биш харагдаж байна. Нийслэлд үйл ажиллагаа явуулдаг хэдэн аж ахуйн нэгж зогсоод байна вэ. Нийслэл хэд хоногийн хөл хориг даах чадалтай байна вэ?
-Сүүлийн 10 сарын хугацаанд дотооддоо алдахгүйгээр эх оронч худалдан авалт хийх шийдвэр гаргаад явж байсан. Бэлэн байдлын зэргийг сулруулж, гэрийн 14 дэглэмийг больсон байгаа. Үүнээс болж дотоодод халдвар алдсан хэмээн холбогдох байгууллага үзсэн. Эдийн засагтай холбоотой асуудал гарч ирнэ. МҮХАҮТ-тай хоёр ч удаа дараалан уулзаж байхад аж ахуйн нэгжүүд хүнд байдалд байгааг хэлсэн. Өчигдөр онлайнаар хуралдахад нийт 3530 аж ахуйн нэгжээс судалгаа авахад 96 хувь нь хүнд нөхцөлд ороод буйгаа илэрхийлсэн. Нийслэлийн хэмжээнд нийт 126 мянган жижиг, дунд аж ахуйн нэгж ажилладаг гэсэн тооцоо байдаг.
Бидэнд бодлого байхгүй биш байгаа. Хямралын эсрэг бизнесийн зөвлөл байгуулсан. Иргэдийн хувьд өдөр тутмын бэлэн байдлын зэргээр цаашид явъя гэдэг байр суурьтай байгаа. Бид ч гэсэн ийм байр суурьтай байгаа. Бүх нийтийн бэлэн байдлын зэргийг өдөр тутмын бэлэн байдлын зэрэг руу шат дараатай шилжих хэрэгтэй. Үүний тулд иргэд аж ахуйн нэгж заасан үүрэг, чиглэлийн дагуу ажиллах хэрэгтэй. Олон улсад ч гэсэн шат дараатай бэлэн байдлын зэргээр бууруулж, эдийн засгаа дэмжиж байгаа. Бид ч гэсэн энэ дагуу ажиллана. Харин цаг хугацаа, судалгааны ажлуудыг цэгцлэн нэгдсэн шийдвэр гаргахаар ажиллаж байна гэлээ.