Уул уурхай, хүнд үйлдвэрийн сайд Г.Ёндон Монголросцветмет ТӨҮГ-ын данснаас 10 гаруй сая төгрөгийг хоёр хүүхдийнхээ сургалтын төлбөрт шилжүүлсэн дуулиан намжаагүй байхад дахин нэг дуулиан дэгдлээ.

Монгол Улсын саалийн ганц үнээ гэгддэг, улсын төсвийн жинтэй хувийг бүрдүүлдэг Эрдэнэт үйлдвэрийн данснаас дарга, удирдлагууд 100, 100 саяар гэр бүлдээ зарцуулдаг баримт ил болов. Тодруулбал, Эрдэнэт үйлдвэрийн захирал Х.Бадамсүрэн өөрийн охин Б.Буянжаргалынхаа сургалтын төлбөрт 102.385.101 төгрөгийг Канадын Торонтогийн Их сургуульд 2019 оны долдугаар сарын 19-нд шилжүүлжээ. Түүнээс гадна 20 сая төгрөгөөр унадаг дугуй худалдан авч, хагас тэрбум төгрөгөөр автомашин худалдан авах тендер зарласан, массажны сандал, мөнгөн аяга зэргийг ТӨҮГ-ын дансаар төлүүлсэн тухай хэвлэлүүд мэдээлж эхлээд байна.

Эрдэнэт үйлдвэрийн данснаас 100, 100 саяар мөнгө татдаг жишээ ингээд дуусахгүй. Эрдэнэт үйлдвэрийн Хамтын ажиллагаа, нийгмийн асуудал хариуцсан орлогч захирал Д.Дэлгэрбаяр "Эмчилгээний зардал" гэж 219,063,796 төгрөгийг үйлдвэрээс гаргуулсан баримт “Шилэн данс”-аар ил болжээ.

Б.ЗАЯА

Эх сурвалж: shuurhai.mn