ХӨСҮТ, ГХЯ-аас хийдэг коронавирусийн талаархи ээлжит мэдээллийн үеэр ХӨСҮТ-ийн захирал Д.Нямхүү томуугийн вакцины талаар мэдээлэл өглөө. Тэрбээр "Есдүгээр сарын сүүлээр ирэх вакциныг коронавирусийн туршилтын вакцин гэж ташаа ойлгож байна. Дэлхий дээр ковидын вакциныг дэлхийн тэргүүлэх улс орнууд хийж байгааг чих тавин чагнаж байна. Томуугийн вакцин энэ сард багтаж орж ирнэ. ЗГ-аас захиалсан 120 мянган тун вакцин, АНУ-ын ХӨСҮТ-ээс бидэнд хандив болгон өгч буй 89 мянга 450 мянган тун, ДЭМБ-ын дэмжлэгээр 300 мянган тун вакцин ирэх юм.
Иймд томуугийн вакциныг ирэх үед зорилтот бүлэг буюу хамгийн түрүүнд хийх шаардлагатай бүлгүүдэд хурдан хийх ажлыг цаг алдалгүй зохион байгуулна. Үүнд эмч, эмнэлэг, хууль хүчний, хил гаалийн ажилчид ордог. Учир нь эдгээр нь хүмүүстэй хамгийн их уулздаг, иргэдтэй тулж харьцдаг тул сонгож авдаг. Бидний хамгийн гол зорилтот бүлэг бол 5 хүртэлх насны хүүхдүүд, 65-аас дээш насны өндөр настнууд болон жирэмсэн эмэгтэйчүүд юм” гэлээ.