Лондоны металлын биржид энэ сарын 20-ноос эхлэн зэсийн ханш тонн тутамдаа 7000 ам.долларт хүрчээ. Зэсийн үйлдвэрлэлээрээ дэлхийд тэргүүлэгч Чили улс үйлдвэрлэлээ дөрвөн хувиар буруулсан нь эрэлтэд нөлөөлж, ханшийг ийнхүү өсгөжээ. Мөн зэсийн хамгийн өндөр хэрэглээтэй БНХАУ-ын эрэлт нэмэгдэж, импорт өсч байгаа нь ханш өсөхөд нөлөөлсөн байна. Чили улсын “Коделко” компани дэлхийн зах зээлд зэсийн ханш өсч, сүүлийн жилүүдэд цахилгаан хөдөлгүүртэй машины эрэлт хэрэгцээ нэмэгдсэнтэй холбогдуулан энэ онд 1.7 сая тонн зэс олборлохоор төлөвлөжээ. Тус компани 15 тэрбум тонн зэсийн, 50 тэрбум тонн зэсийн хүдрийн нөөцтэйгөөрөө Чилийн эдийн засагт голлох үүрэг гүйцэтгэдэг. 18 мянган ажилтантай тус компани зэсээс гадна кали, кобалт болон бусад төрлийн ашигт малтмалыг олборлодог ажээ. Тиймээс өнгөрсөн онд Чили улс дангаараа дэлхийн зэсийн олборлолтын 23 хувийг бүрдүүлсэн бол БНХАУ импортын 50 хувийг эзэлсэн байна. Зэсийн үнэ 2012 оноос тасралтгүй буурч, сүүлийн хоёр жилд дэлхийн зах зээл дээр хамгийн муу үзүүлэлтэй түүхийн эдийн нэгд тооцогдож байсан боловч өнгөрсөн оны сүүлээс өсч, энэ сард оргил төвшиндөө хүрлээ. Олон улсын шинжээчид зэсийн хэрэглээ 2020 он гэхэд 25.5 сая тоннд хүрнэ гэсэн таамаг дэвшүүлжээ.
Б.Саруул