Тулгар төрийн 2227 жил, Их Монгол Улс байгуулагдсаны 812 жил, Үндэсний эрх чөлөө, тусгаар тогтнолоо сэргээн мандуулсны 107 жил, Ардын хувьсгалын 97 жил, Ардчилсан хувьсгалын 29 жил, Үндэсний их баяр наадмын үндэсний бөхийн барилдаанд Увс аймгийн Ховд сумын уугуул, Улсын арслан Намсрайжавын Батсуурь түрүүлж Монгол улсын 23 дахь аварга боллоо. .
Эцэг болон эхийн талаасаа бөхийн удамтай Н.Батсуурь арслан улсын наадамд дөрвөнтээ шөвгөрсөн бөгөөд 2014 онд Төрийнхөө Их баяр наадамд түрүүлж байсан бөх билээ.
2006 онд Ховд аймгийн баяр наадамд 5 давж аймгийн начин, 2011 онд Дархан-Уул аймгийн 50 жилийн ойн барилдаанд түрүүлж аймгийн арслан цол хүртсэн. Бөхийн өргөөнд болдог барилдаануудад аварга, арслан, гарьд, заан цолтнуудыг өвдөг шороодуулж үзэгчдийг шуугиулдаг дайчин, шуурхай, хийцтэй барилдаантай бөх бөгөөд 2011 оны цагаан сарын барилдааны үеэр Даян аварга А.Сүхбат түүнд "Ирээдүйн аварга" шагналаа гардуулсан. Тэрбээр 2013 оны улсын наадамд 6 давж шөвгөрөн, улсын харцага цол хүртжээ.
2011 оны жүдо бөхийн насанд хүрэгчдийн улсын аварга шалгаруулах тэмцээнд түрүүлж "Спортын мастер", 2011 оны дэлхийн цомын аваргаас хүрэл медаль хүртэж "ОУХМ" цол хүртсэн, 2013 онд мөн жүдо бөхийн улсын аварга болсон, 2012 оны дэлхийн цомоос хүрэл, 2012 оны Азийн аварга шалгаруулах тэмцээнээс хүрэл медаль хүртсэн жүдоч. Өдгөө 31 настай. 2013 оноос жил дараалан шөвгөрч байгаад өнгөрсөн жил 4-ийн давааны нугалаанд Булганы бөх Б.Тамирт өвдөг шороодсон.
Энэ жилийн наадмаар дөрвийн даваанаас эхлээд А.А Ц.Сандагдорж, У.Н Д.Амарсайхан, А.А Ц.Бямба-Очир, А.А Н.Золбоо, У.З Н.Жаргалбаяр, Улсын аварга Ч.Санжаадамба нарыг даван Төрийнхөө Их баяр наадамд хоёрдахь удаагаа түрүүлээд байна.
Өвөө Ж.Гэлэг нь улсын начин, аав Г.Намсрайжав нь улсын харцага, авга ах химийн ухааны доктор,профессор, самбын ОУХМ Г.Даваасамбуу нь улсын начин, Г.Дансран нь аймгийн заан, Н.Баярмагнай нь чөлөөт бөхийн Ази тивийн аварга, улсын 5 удаагийн аварга, ОУХМ, аймгийн арслан цолтой. Мөн олимпийн хүрэл медальт, МУГТ, улсын начин Р.Даваадалай, чөлөөт бөхийн дэлхийн аваргын хүрэл медальт, МУГТ, улсын начин Ло.Энхбаяр, улсын начин Ло.Эрхбаяр нар ээжийнх нь хамаатан. Хоёр талаасаа бөхийн удамтай Батсуурь арслан ийнхүү Монгол улсын 23 дахь аварга боллоо.